الأرز ضيف دائم علي كل مائدتك بيقدملك 5 وصفات جديدة للأزر
1- طريقة عمل الأرز بالخلطة
أول خطوات عمل الأرز بالخلطة هي أننا نغسل الأرز وهسيبه يصفي المياه منه. هنحط للأرز له سمنة وزيت كويسين ونحمره لحد ما ياخد لون ذهبي، ولما يبدأ يلون هنوطي عليه النار شوية عشان ما يتحرقش.
وهنفضل نقلبه كويس، والأحسن أننا منحطلوش قرفة من الأول، لأن القرفة هتديله لون خادع، فهنحطها بعد ما يتحمر ولونه يتغير، والأزر بالخلطة عموماً بيحب القرفة كتير، وبعدين هنحط وملح زبيب، وفي الوقت نفسه هنكون غلينا مياه، وهنضيفها على الأرز بشكل تدريجي ونقلبه كويس.
بعد كدة هننقل الأرز على نار أهدى شوية، وهنظبط المياه بحيث تكون أعلى شوية من الأرز وأول ما تبتدي تتشرب هنغطي الأرز وننقله على نار أهدى ومش هنفتح عليه غير بعد ما يستوي.
ولما يستوى هنحطه في طبق تقديم، وهنضيف عليه مكسرات، ونكون مشوحينها قبلها في سمنه وزيت، وبكدة يكون الطبق جاهز على التقديم.
2-طريقة عمل الأرز المعمر
الأرز المعمر ممكن يتعمل سادة أو معاه حمام أو لحمة زي ما تحبي.
المكونات
أرز مغسول
لبن “ويفضل أنه يكون من عند اللبان مش معلب”
ملح
فلفل
قشطة
الخطوات
هنحط الأرز في طواجن، ونكون عاملين حسابنا أنه لكل كوبايا أرز هنحط كوبايتين لبن، عشان الطعم يطلع مظبوط، والأرز يتشرب اللبن بشكل كويس.
بعد كدة هنضيف الملح والفلفل على الأرز واللبن، ونقلب كويس، هنضيف على الأرز القشطة بس لو عاملين أرز معمر سادة. لكن لو أرز معمر بالحمام، هنسلق الحمام ونفصصه، ونضيفه على الأرز، ولو حابين نضيف طعم حلو للحمام، ممكن نشوحه في السمنة قبل ما نضيفه على الأرز.
هنسيب الأرز ساعتين ينقع في اللبن، وبعد كدة هنضيف عليه القشطة من على فوق الوش، والقشطة هي اللي بتدي للأرز اللون البني اللي شكله حلو. نسخن الفرن كويس، ونحط الأزر على الرف العلوي فيه، بحيث نسويه من فوق، ونسيبه لحد ما وشه ياخد اللون البني، ويكون الأرز استوى.
3 -طريقة عمل الفتة المصري (وصفات جديدة للأزر)
أول حاجة عشان نعمل الفتة المصري، هنسوي الأرز، بس قبل ما نسويه هنشوح توم، ونحط الأزر فيه ونسويه. هنحمص العيش، ونسلق اللحمة، وبعد ما نسلق اللحمة هنشوحها في الفرن أو في سمنة على البوتجاز.
هنسقي العيش في الشوربة، وبعدين هنحط معلقة أرز ونقلبها في العيش، بحيث أننا ناكل كل المكونات مع بعضها مش طبقات منفصلة، وهنضيف كمان عليهم شوية صلصة، ونسيب العيش لحد ما يتشرب. هنضيف باقي الأرز بعد كدة، وهنصيف عليه الصلصة، وهي عبارة عن توم وخل، وممكن تعملي صوص تاني للفتة عبارة عن خل وتوم برده بس من غير ما تضيفي عليهم صلصة، وفي الآخر هنحط اللحمة على وش الفتة، وبالهنا والشفا.
4-طريقة عمل فتة الفراخ
نقدم لك طريقة عمل فتة الفراخ اللباني.
المكونات
عيش لبناني، وبنقطعه مربعات بالمقص وبنحمره، وممكن كمان تشيليه في الفريزر، وتطلعيه وقت ما تحتاجيه. علبة زبادي، وهنحط عليها معلقتين طحينة، وممكن كمان نضيف خل وتوم بعد ما نحمرهم على النار، بيدوا طعم مختلف شوية للزبادي.
صدور فراخ ونقطعها مكعبات، ونتبلهم ببصل وتوم بودرة، ممكن تحمري الفراخ على النار أو تسلقيها زي ما تحبي. مكسرات “وتكون محمرة على النار”
الخطوات
هنحط في الأول العيش بعدين الفراخ والزبادي، والمكسرات. الأحسن أنك تجهزي الفتة وقت الأكل على طول، وما تسيبهاش وقت طويل لأن العيش هيتشرب من الزبادي، وهيبقى طري أوي ومش حلو.
5-طريقة عمل فتة الشاورما
بنقدملك طريقة عمل فتة الشاورما من الوصفات جديدة للأزر
المكونات
- أرز أبيض عادي مستوي
- عيش ناشف
- شاورما
طريقة عمل الشاورما
هنجيب نص كيلو لحمة أو فراخ متقطعة صوابع طويلة، هنحط عليهم معلقتين زيت زيتون، معلقة مسطردة، معلقة خل، ملح وفلفل، ونص ليمونة، توم بودرة، بصل بودرة، بهارات شاورما.
أهم حاجة في الشاورما أنها تبات في التتبيلة عشان تديلنا الطعم اللي عايزينه، وبنسويها عادي جداً، بنحمرها في حلة زي ما هي لحد ما تستوي، وقرب ما تستوي خالص بنحط عليها البقدونس، والطماطم.
الخطوات
هنحط الأزر في الطبق، وهنحط العيش الناشف حواليه، وهنضيف الشاورما على الأرز فوق الوش، والأرز هيتشرب الصوص بتاع الشاورما.
- كدة الشاورما جاهزة وبالهنا والشفا.
