تساقط الشعر الوراثي بيحتاج فترة أطول في العلاج، فبمجرد ما الدكتور بيشخص أن سبب تساقط شعرك وراثي لازم تعرفي أنه مش هيقدر يعالج السبب، ولكنه يقدر يعالج العرض، لأن السبب بيكون في الجين الوراثي، وده مش هنقدر نغيره أو نصلحه، بس نقدر نصلح أعراض الجين.
طرق علاج تساقط الشعر الوراثي
المينوكسديل
المريضة بتحتاج أنها تاخد علاج بسيط وبيكون مرتين في اليوم وهو المينوكسديل، المينوكسديل دواء هايل في علاج تساقط الشعر، ولكن بمجرد ما توقفي تعاطيه شعرك هيرجع يقع تاني، لأنه فيه أسباب كتير ممكن تخليكي مضطرة توقفي المينوكسيدل منها الحمل مثلاً.
لكن لو مفيش حمل أو أسباب تمنع علاجك بالمينوكسديل بنستخدمه، لأن المادة الوحيدة المصرحة من الهيئة الدوائية الأمريكية لعلاج النوع ده من تساقط الشعر.
ومع العلاج ده بنعالج كمان أي سبب تاني بيسبب تساقط الشعر مع الجين الوراثي زي الغدة الدرقية مثلاً أو الإنيميا أو نقص فيتامين د.
البلازما
البلازما ممكن نستخدمها في أننا ندي دفعة قوية في وقف تساقط الشعر، لكن مش هتقدري طول عمرك تعملي حقن بلازما عشان توقفي تساقط الشعر.
الإضاءة المنخفضة لليزر
وهي من طرق العلاج الناجحة جداً، بتثبتيه على شعرك يوم بعد يوم، وبيحفز نمو الشعر الجديد، من غير ما تضطري تروحي لعيادة كل شوية، وآمنة جداً وغير مؤلمة.
زراعة الشعر
طول ما أنتي في المراحل الأولى لتساقط الشعر يبقى تقدري تعملي زراعة الشعر، عشان تزودي كثافة شعرك للضعف، ومفيش أي وسيلة تانية تقدر تعمل كدة غير زراعة الشعر.
